Nr.1

Uf dr Foto gseht er uus wi dr Urs Bolz vo PricewaterhouseCoopers,

"Wichtig isch", seit dr Gröbeli, "dass dr gäng di sibe goudige RuckZuck-Regle vor Ouge heit. Di erschti: Mache, was me mues u nid nume säge, was me sött. Di zwöiti: Wüsse, was me wott u nid nume lose, was si wei. Di dritti: D Pfuuscht glych no lieber im Sack aus uf em Oug. Di vierti: We me's aune rächt macht, macht men öppis fautsch. Di Füfti, das isch d Sitzigsregu: Besser churz u gschyd aus läng u dumm. Di Sächsti: We me's nimmt, wi's chunnt, de chunnt's, wi's wott. Drum näh mer's nid, wi's chunnt, de cha's o nid cho, wi's wott. U schliesslech no di Sibeti: Politik isch d Kunscht vom Mügleche, heiterebimbam."

U we de öpper fragt, was das itz konkret heissi, de seit dr Gröbeli: "Das heisst erschtens, dass dir konsequänt uf New Public Management umsteuet. De Lüt d Brätter vor de Chöpf abschrube, drus Taburettli zimmere u se druf steue. Itz hei si dr Überblick u gseh, wo men intelligänt cha spare. Näh mer es Byspiu. Im Aargou hei si gmerkt, dass d Soziauhiuf viu zviu choschtet. U de hei si beschlosse, di mües vo itz aa choschtenöitrau wärde. U de hei si dene, wo nüt hei, o das no gno u's dene gä, wo aus hei. U dene, wo aus hei, hei si aus gno u's dene gä, wo nüt hei. U itz hei die, wo aus gha hei, gwüsst, wi das isch, we me nüt het. U die, wo nüt gha hei, hei gwüsst, wi das isch, we men aus het. U itz hei die, wo nüt gha hei u itz aus hei, dene, wo aus gha hei u itz nümm hei, d Häufti vo auem gä. U itz het niemer meh nüt u niemer meh aus u aui hei gnue."

"Was i dermit wott säge", seit dr Gröbeli, "isch das, dass me haut o chli öppis mues waage, we me intelligänt wott spare. Gschyder mau viu z früeh, aus gäng chli z spät. Gschyder mau viu z viu, als gäng chli z weni. Gschyder mau viu z gross, aus gäng chli z chli. Gschyder mau ganz lätz, aus gäng chli dernäbe."

"U itz chunnt öppis Zwöit's", seit dr Gröbeli, "u dadermit wirde ni no konkreter. Gäng zersch spare u ersch nächhär ersch luege wo. We me zersch luegt wo, u nächhär ersch wott spare, de seit nech jede Diräker, i sym Amt chönn me nid spare, da sig sowiso scho dr Wurm drinn u we men itz no mües spare, de fräss sech dä Wurm gäng wyter u zletzscht heig me nume no ne Wurm u kes Amt meh."

"Was i nech zum Schluss no wett mit ufe Wäg gä", seit dr Gröbeli, "isch öppis, wo dir nie dörft vergässe: d Erfougskontroue. Da git's e ganz en eifachi Regu: We's nech glingt, d Fougechöschte vom Spare uf ds Angerhaubfache vom Gschparte abezdrücke, de heit dr intelligänt gschpart.

---

Nr. 2

Uf dr Foto gseht er uus wi dr Bundesrat Couchepin,

aber es isch nid ihn pärsönlech, es isch dr Blasius Blaser, dr Chef vor Sektion Sparmassnahmen im Bundesamt für Gsundheit, un är het itz äntlech usegfunge, wi me d Choschtenexplosion im Gsundheitswäse nid nume cha stoppe, nei, wi me di Chöschte ganz massiv cha zrüggfahre.

"Aus erschts", seit dr Blaser, "aus erschts müesse mer ds Chrankeversicherigsgsetz totau revidiere. Mir mache zwo Versicherigs-Kategorie. I di erschti tüe mer di junge gsunge Ryche, di ryche junge Gsunge u di gsunge ryche Junge. I di zwöiti Kategorie chöme di aute chranken Arme, di armen aute Chranke u di chranken armen Aute. Di erschti Kategorie, das isch d Grundversicherig, u di isch obligatorisch. Di zwöiti, das isch d Zuesatzversicherig, u di isch freiwiuig, aber leider nid biuig. Wär sech hie wott la versichere, mues de haut vilech chli bim Ässe spare oder unger ne Brügg ga wohne. Aus cha me bekanntlech nid ha im Läbe. Für d Solidarität unger de Versicherete z fördere, schaffe mer en Usglychsfonds. I dä Fonds zahle mer au Jahr e Milliarde us dr Zuesatzversicherig y, u us däm Fonds zahle mer au Jahr e Milliarde a d Grundversicherig uus. Dadermit schaffe mer näbeby o no grad dr finanziell Aareiz, rych, jung u gsung z blybe", seit dr Blaser. Das lüüchtet em Couchepin y.

"Aus zwöits", seit dr Blaser, "aus zwöits zieh mer bi Tarmed d Schruben aa. D Dökter müessen effiziänter wärde. Es ligt eifach nümm drin, e Stung lang a eim einzige Patiänt umezdökterle. Hopp, ufe Schragen, e Sprütze i ds Füdle, dr Nächscht bitte. So mues das vo itz aa ga. So chan e Dokter, wenn er sech chli Müeh git, ir Stung sächzg Spütze mache. Für jedi überchunnt er e Füfliber u de het er e Stundelohn vo 300 Franke", seit dr Blaser. O das lüüchtet em Couchepin y.

"Ds nächschte, wo mer müessen aaluege", seit dr Blaser, "ds nächschte sy d Medikamänt. Da zahle mer nume no di homöopatische Piueli. Di nütze zwar nüt, aber si schaden o nid." Das chönn me leider nid mache, seit dr Couchepin, da sig dr Vasella dergäge, u we dr Vasella gäg öppis sig, de chönn dr Bundesrat nüt mache. O d Parallelimporte hätt me scho lang bewiuiget, we dr Vasella nid dergäge wär. Ir Schwyz heige mer haut äbe di diräkti Demokratie, da chönn jede mitbestimme, seit dr Couchepin.

"De müesse mer luege", seit dr Blaser, "de müesse mer luege, dass mer ds Sparpotenzial bi de Spitäler vou chöi usschöpfe. Mir tüe zersch jedes zwöite Spitau zue u de nomau jedes zwöite. Itz müesse mer natürlech d Spitex verdopple u de nomau verdopple. Aber es darf nid meh choschte. Darum müesse mer d Löhn vo de Spitex-Mitarbeiterinne u –Mitarbeiter haubiere u de nomau haubiere. Di söue d Fröid ar Arbeit dopplet zeue u de nomau dopplet. Derzue mues o d Spitex effiziänter wärde. Für dass si schneuer vom einte Patiänt zum angere chöme, lö mer i di Spitex-Outöli Formu-1-Motore la yboue. So chöi si am einten Ort afe schaffe, bevor si am angere ufghört hei. Mit chli Üebig sötte si's de sowyt bringe, dass si bi de Patiänte gö, bevor si cho sy.

Das lüüchtet em Couchepin itz wider y, un är unterbreitet di Sparmassnahmen em Bundesrat. Dr Blocher wett d Spitex-Löhn nomau haubiere. Dr Merz isch mit auem yverschtange u wär o mit auem angeren yverschtange. Dr Schmid wett d Spitex mit F/A-18 usrüschte. Dr Leuenberger schrybt es Gedicht über d Spitex. Dr Deiss seit, dr Blocher sig e Löu. D Calmy-Rey schliesst sech ihrem Vorredner aa. So het dr Bundesrat i kollegialem Geischt di nöji schwyzerischi Gsundheitspolitik diskutiert u verabschidet.

"Da gseht me wider emau", seit dr Blasius Blaser, "we me wott, de cha me spare. We überau so gspart würd wi im Gsundheitswäse, de chönnt sech d Schwyz äntlech wider emau nöji Kampfflugzüüg leischte." Öb me de nid o bim Militär sött spare, waagt itz dr Couchepin z frage. "Das geit leider us verfassigsrächtleche Gründ nid", seit dr Sanitäts-Oberscht Blaser, "ds Militär isch e Gloubensfrag u steit unger em Schutz vor Gloubens- u Gwüssensfreiheit."

(c) SGVW